Lah saminggu Atang pulang baliak ka kantua polisi dek dikaduan bininyo malakukan kekerasan dalam rumah tangga.
Katiko basobok di simpang ampek, Jila langsuang batanyo, nak tahu bana apo garan nan alah tajadji.

“Baa kanti? Kabanyo waang mambuek tindak kekerasan ka bini waang? Iyo tu? Apo indak nio bini waang tu lai ka nan kareh-kareh? Katuju dek inyo lakinyo tu lunak sadonyo? Beko kok lunak sadonyo, inyo mancari nan kareh-kareh pulo ka laki-laki lain, baa? Iyo lah tabaliak bana dunia ko kini.
Kareh indak nio, lunak indak pulo katuju,” kecek si Jila mengkatutuih bakutubah sambia basanda ka tonggak lampu merah nan sadang pudua. Atang cuma maangguak-angguak sajo, utaknyo sakik.

“Baa mangko haniang? Lai ado saksi bahaso iyo waang nan malakukan tindak kekerasan ka bini waang tu? Salamoko baa? Kan dek karano waang lai kareh tu mako kalian dapek anak tujuah urang ndak? Agak hati den, bini waang tu lah tapangaruah curito padusi-padusi nan indak balaki pakaro jender. Tahu waang ndak Tang, padusi-padusi nan indak balaki nan bacirotet pakaro jender tu, mereka tu kan indak tahu bana baa lamaknyo kareh laki-laki,” kato si Jila sambia mancaliak paja-paja lewat pakai jin sampik, baju kaus jarang.

“Kini baitulah. Bia waden pai manamui bini waang tu. Den tanyo bana elok-elok. Baa mangko sampai hati bana inyo mangaduan waang, sampai waang musti sakik utak pulang baliak ka kantua ka kantua polisi,” kato si Jila dek karano Atang tatap sajo haniang sajak dari tadi.

Tadanga kaba, si Atang lah dimasukkan ka kandang situmbin. Duo hari sudah tu, si Jila bagageh pai ka kantua polisi. Tapi inyo heran, indak ado Si Atang doh. Kecek polisi, Atang lah balapehan tadi malam. Si Jila galak bagumam. Nyo cari si Atang sampai ka Muaro Panyalinan.

“Tang. Di siko molah waang kironyo. Mangaie garapu waang di muaro ko. Waden lah batanyo bana ka bini waang. Inyo lah bataruih tarang. Lai namuah waang mandanga kecek den indak?” kato si Jila mancaliak si Atang acuah bebe.

“Baa kok ka waang bini den bataruih tarang, baa kok indak ka waden. Kan lakinyo waden,” kato si Atang tarabo.

“Danga dulu kanti. Jaan curiga se dulu.Danga kecek den,” kato si Jila maumbuak si Atang.

“Jadi, den danga molah,” kato si Atang sambia maloro tali kaienyo.
Malatuih galak si Jila tak tantu sabab. Si Jila galak sajadi-jadinyo, sampai baraie katiaknyo dek galak. Atang heran, baa mangko tibo-tibo galak se Jila. Lah gilo?

“Apo nan waang galak an galadie!’ hariak si Atang.
Si Jila baranti galak. Langsuang babisiak ka talingo si Atang.
“Tang. Bini waang tu sakik hati, baa mangko tiok minggu waang masuak koran. Terkenal waang. Jadi buah muluik waang. Bini waang tu ingin pulo namonyo masuak koran saroman lakinyo. Inyo ingin kesetaraan jender. Itu sababnyo, waang dikadukannyo ka polisi. Supayo namonyo masuk koran pulo,” kato si Jila galak takangkang.
“Dek karano namo waden taruih ado dalam koran?” tanyo si Atang.

“Iyo. Dek karano pagi ko namo bini waang tu lah masuak koran sebagai padusi nan mangaduan tindak kekerasan seorang suami ka istri, bini waang lah gadang hatinyo. Lah tacapai cito-citonyo. Dek cito-citonyo lah tacapai tu, langsuang nyo cabuik pangaduannyo ka polisi. Itu sababnyo polisi malapehan waang dari tahanan,” kato si Jila batambah samakin gadang galaknyo.

“Kalau nak masuak koran tiok hari, jadi bini bupati atau bini walikota molah! Kok indak, jadi uni uda!” kato si Atang sambie maloro tali kaienyo.

“Lai kajadi urang tapijak canggu, tabaka ikue, kebakaran jenggot, sadonyo nak masuak koran,” kato si Jila baguliang-guliang dek galak nan indak tatahanan dek inyo.

Kasudahannyo si Atang jo si Jila samo-samo galak, samantaro kaie si Atang lah dilarian lauak.
“Lah dilarian lauak kaie den ko ha! Jaan galak juo lai, hantu!” hariak si Atang.