Di muko palanta lapau ubek Mak Sati tabantang spanduk babunyi:

SELAMAT DATANG PESERTA DISKUSI PIL KADA. (tanggal 10 ? 3 ? 2005, pukua 13.00, sudah Jumahat)

Sutan Mudo, Rajo Bagindo, Pono, Ajo Udin dan Sutan Kayo, turun dari oto mambaco tulisan spanduak.
Mak Sati ko, ado-ado sajo nan dibueknyo. Baliau pandai mamanfaatkan situasi, sahinggo aktivitas baliau tu hiduik.
Katiko pamarentah merencanakan Pil Kada, Mak Sati lah mandahului jo diskusi.

Tapi itu alun tantu samo jo Pil Kada pamarentah. Mungkin Mak Sati promosi ubek kada. Nan rancak awak singgah sabanta supayo jaleh di awak apo bana mukasuik spanduk nan dipasang Mak Sati; Sutan Kayo manangahi karaguan rombongan.

"Assalamualaikum" Alaikumsalam, si Usuik nan manjawab. Mak Sati indak nampak.
"Di maa Mak Sati Suik?" Ajo Udin batanyo.

Ado di dalam; masuaklah! Dari dalam lapau Mak Sati manyambuik nan datang sambia manyalami surang-surang.
Tamu lah duduak di tampaek masiang-masiang. Mak Sati lansuang ka kurisi tinggi.

Mak Sati mamuloi. "Baa, labiah saputaran indak tampak puncak iduang angku-angku. Kama sajo bakaliaran?" Bak caro ikolah Mak Sati, kami cuma indak singgah saja katiko lalu di muko kadaiko. Indomo manjawab mawakili kasadonyo.
"Kini apo carito angku-angku? Sia nan ka maanta kecek, silakan".

Indomo manggaregeh mangecek manyampaikan mukasuik rombongan.
"Macamko Mak Sati. Kami nak tahu makasuit isi spanduk nan tapasang di muko tu. Kini kami datang nak batanyo, apokah Mak Sati mempromosikan sejenis ubek kada nan ka dijua atau diskusi tantang pamilihan kapalo daerah."

Baiklah angku-angku. Ambo ucapkan tarimo kasih karano syaraf angku-angku tagisia dek kalimaek spanduk.
Dangakan elok-elok, awak mulai diskusi awal hari ko juo.
Isi spanduk tu adolah kreasi Mak Sati surang. Nan ka dibicarokan khusus pil kada awak, untuak paubek kada urang Sumbar nan daerah kekuasaannyo barado di Minangkabau.

Selaku urang Minangkabau, tantu awak harus taimbau mampaeloki nan rusak, apolai nan manyangkuit nasib anak-kamanakan nan barado di kampuang.

Karano kato pil dari bahaso Balando, nan lah manjadi bahaso kito, tantu awak lah mangarati apo makasuitnyo.
Dari segi bahaso Pil Kada aratinyo ubek kada.
Kada ado duo macam.

1. Kada nan sabana kada, yaitu panyakik kulik nan namonyo bamacam-macam, sarupo, tukak, pakuang, kurok. Urang kanai panyakik kada dapek digambarkan jo kato-kato; alah ditukak jo ditekong, kanai pakuang-baliliaran, kini barumah di tapi ayia.

2. Nan kaduo, kada dalam arati kiasan, yaitu kada dakam utak. "Utaknyo di kada", mukasuiknyo urang tu bodoh, indak bisa babuek nan batua, pikiaran condoang ka nan jahek.

Jadi hasil diskusi iko, nanti akan menghasilkan tando-tando urang nan indak bakada dan mancubo mengetahui tando-tando utak bakada tu! Jikok tando-tando samacam itu ado di salah surang calon kapalo daerah, inyo jan sampai dipiliah, Pono mancubo maresume.
Ambo tambahi. Ajo Udin maagiah filsafat , aratie nyo awak maingekkan wae sabalun kanai.

Batua, iyo itu bana, jawab Mak Sati.
Materi diskusi alah disiapkan Usuik. Kok lah salasai diolah, disarahkan ka tim sukses.
Usuik, cobo bao kamari ramuan pil kada. Agiah sabungkuih surang, iko babantuak resep.

Dek karano resepko indak dari doto, tapi dari Mak Sati sahinggo awak masiang-masiang dapek mambaco.
Setelah dibagikan, si Usuik mambacokan resep.
Nan lain manyimak.

Resep pertamo tantang kamampuan raso seorang kapalo daerah.

1. Kapalo daerah harus mamiliki kategori sarupo kayu gadang di tangah padang.
Batangnyo tampaek rang basanda, ureknyo tampaek rang baselo, dahannyo tampaek urang bagantuang, daunnyo tampaek bataduah diari hujan, tampaek balinduang di ari paneh, buahnyo elok dimakan.

2. Harus arif bijaksano. Tau diereng dengan gendeang, tau di ribuik ka mandingin

3. Indak sombong, gapuak indak mambuang lamak, cadiak indak manjua kawan

4. Harus adia, manimbang samo barek, maukua samo panjang

5. Harus jujur, bulek indak basandiang, indak manuhuak kawan sairiang

6. Disiplin, batanggo naik, bajanjang turun, kusuik manyalasai, karuah mampajaniah.

Resep nan kaduo tantang kamampuan pareso nan harus dimilikinyo. Kini jaman globalisasi kato urang. Dunia alah manjadi satu dalam bidang informasi dan transportasi, lalu manyusul pulo bidang-bidang lainnyo pada kehidupan manusia maso kini.
Kapalo daerah harus mangarati pulo tantang masalah iko.
Kini kamajuan diukua, jo kemampuan Sumber Daya Manusia manusianyo.

Kapalo daerah Sumbar nan ka datang haruslah urang nan mangarati bana tantang konsep dan keuntungan industri otak nan digagas pak Emil Salim.

Jadi bukan urang nan hanyo sibuak mamikiakan industri "gulai utak" untuak menservis wisatawan!
Daerah Sumbar secara budaya dan SDA pendukuang saroto geografisnyo indak cocok untuak industri-industri hiburan semacam itu.Kok inyo mangundang penanam modal industri tekhnologi canggih pertanian-peternakan, dan pendidikan, hal iko indak masalah dek awak.
Tapi kalau mangundang penanam modal untuak industri industri permen, rokok sarato karaoke, jo panti pijat, itu namonyo mambao panyakik untuak anak-kamanakan.
Tamasuak pulo barang-barang nan lah bisa dibuaek dek urang kampuang sarupo kecap, sabun, kopi indak paralu didatangkan urang dari lua.

Jaan sampai kapalo daerah indak mangarati permasalan sarato parubahan sarupo itu. Contoh keteknyo tantang internet sebagai sarana gratis atau katokanlah murah untuak mendapek informasi atau ilmu pangatuhuan ko. Kapalo daerah awak nan lalu-lalu, alun ado nan manaruah perhatian serius untuak pemanfaatannyo.

Iyoko duo resep atau resep raso jo pareso. Bahas surang-surang, karano angku-angku punyo labiah dari ambo nan hanyo tamat sakolah desa jaman saisuak.

Angku nan balimo tacatat sebagai peserta diskusi. Hasilnyo nanti awak sarahkan manjadi baka Tim Sukses.

Jadilah Mak Sati. Sutan Kayo mintak pulang. Ibarat kapa lah manapi, ibarat golek lah tibo di nan data. Dari spanduk lah tantu jantan batinonyo. Kami balimo lah dicatat si Usuik sebagai peserta.
Asalamualaikum ww. Tiok urang basalam jo Mak Sati.